Qarın ağrısı, qusma, yüksək hərarət... - Həkimdən naməlum virusla bağlı ÇAĞIRIŞ

Son günlər uşaqlar arasında naməlum virus yayılıb. Qarın ağrısı, qusma, yüksək hərarət və halsızlıqla müşaiyət olunan bu xəstəliklə əlaqədar xəstəxanaya üz tutanların sayı da yetərincədir.

Xəstəliyin uşaqdan böyüyə keçdiyi də müşahidə olunur.

Pediatr Qoşqar İsmayılov Bakıvaxtı.az-a bildirib ki, konkret bir deyil, bir neçə virus yayılıb: “Mədə-bağırsaq sistemi xəstəlikləri, rotavirus, adenaviruslardır. Müxtəlif virus, bakteriya mənşəli anginalar və inaq şəklində yuxarı tənəffüs yolları xəstəlikləri yayılıb”.

Q.İsmayılovun sözlərinə görə, yay aylarında indanlar tez-tez dənizə və hovuza getdikləri üçün həm böyüklər, həm də uşaqlar xəstələnir: “Bundan başqa, yol kənarında günün altında satılan qarpız, yemiş almamağa çalışın. Bu zaman viruslar daha da aktivləşir. Meyvələri sərin halda yeyin, qida alarkən son saxlanma müddətinə baxın. Çünki vaxtı keçmiş qidalarda bu viruslar daha aktiv olur və mədə-bağırsaq xəstəliklərini törədirlər”.

Həkim, eyni zamanda, qapalı məkanlardan və xəstə insanlarla kontaktda olmaqdan uzaq durmağa çağırır.