Kərə yağının faydası və zərəri - Həkim

Keyfiyyətli inək südündən hazırlanmış kərə yağı insan orqanizmi üçün çox faydalıdır. Tərkibindəki vitaminlər (A,E,D,B qrup) saçın, dişlərin, sümük sisteminin, dərinin inkişafında xüsusi rol oynayır.

Bu sözləri kərə yağının insan orqanizminə faydalarından və əks təsirindən danışan həkim Vaqif Qarayev qeyd edib. O bildirib ki, kərə yağı beyin hüceyrələrinə və mədə-bağırsaq sisteminə müsbət təsir edir:

“Kərə yağı qadınlarda reproduktiv funksiyanı normallaşdırmaqla yanaşı, uşaqlarda cinsi hormonların yetişməsində faydalı hesab olunur. Amma xolesterini artırdığına görə ürək və beyin damarlarına mənfi təsiri haqqında mübahisələr bu gün də səngimir. Sadəcə, bu təsirlərdən qorunmaq üçün kərə yağından rasional istifadə etmək lazımdır. Gündə 15-30 qram istifadə etmək lazımdır. Bütün günü kərə yağında hazırlanmış qızardılmış və çətin həzm olunan yeməklərdən istifadə etmək zərərlidir. Satışda müxtəlif qiymətlərə satılan kərə yağları var. Ucuz qiymətə olan kərə yağları birmənalı keyfiyyətsizdir. Tərkibində orqanizmə ziyan verən müxtəlif qatqılar var. Onlardan istifadə etməsək yaxşıdır. Kərə yağından istifadə edin, amma aşırı miqdarda yox”.